Ermənistan Dağlıq Qarabağa sülhməramlılar yerləşdirməyi nəzərdən keçirmir.
Bunu Rusiya xəbər agentlikləri bu gün – sentyabrın 30-da Ermənistanın Baş naziri Nikol Paşinyana istinadla yayıblar.
Fransa prezidenti Türkiyənin 'müharibə' ritorikası haqda
Fransa prezidenti Emmanuel Makron sentyabrın 30-da deyib ki, Türkiyənin müharibə” ritorikası Azərbaycanı Dağlıq Qarabağı almağa həvəsləndirir və bu qəbuledilməzdir. Makron hazırda əlində Türkiyənin münaqişədə birbaşa iştirakını sübut edən dəlil olmadığını əlavə edib.
"Türkiyənin Azərbaycanın xeyrinə siyasi bəyanatlarını ehtiyatsız və təhlükəli hesab edirəm", – Makron Latviyada mətbuat konfransında bildirib.
O deyib ki, bu gün (30 sentyabr) axşam məsələni rusiyalı həmkarı Vladimir Putin, sabah isə ABŞ prezidenti Donald Tramp ilə müzakirə edəcək.
Mülki əhalidən ölənlər 14-ə çatıb
Baş Prokurorluq cəbhə bölgəsində sentyabrın 27-dən bəri mülki şəxslərin itkisi ilə bağlı növbəti açıqlama yayıb.
Sentyabrın 30-da günorta saatlarında yayılan məlumata görə, Ermənistan silahlı qüvvələrinin Azərbaycan əhalisinin sıx yaşadığı əraziləri növbəti dəfə ağır artilleriyadan atəşə tutması nəticəsində hazırkı vaxtadək ümumilikdə mülki insanlardan 46 nəfər müxtəlif dərəcəli bədən xəsarətləri alaraq xəstəxanalara yerləşdirilib, 14 nəfər şəxs isə həlak olub.
Amma Azərbaycanın rəsmi qurumları sentyabrın 27-dən qoşunların təmas xəttində ağır silahların işə düşməsindən bəri hərbi qulluqçuların həlak olması və yaralanması ilə bağlı say açıqlamayıb.
Azərbaycan prezidenti: 'Bizim işimiz haqq işidir…'
Sentyabrın 30-da Azərbaycan prezidenti İlham Əliyev ilə xanımı Mehriban Əliyeva sentyabrın 27-dən bəri cəbhə bölgəsində yaralanan və Müdafiə Nazirliyinin Mərkəzi Hərbi Klinik Hospitalında müalicə olunan hərbçilərlə görüşüblər.
AZƏRTAC-ın xəbərinə görə, dövlət başçısı onların qarşısında çıxışında deyib ki, "bizim işimiz haqq işidir": "Biz öz torpağımızda vuruşuruq, Vətən uğrunda vuruşuruq. Bizim davamız ədalətli davadır və əminəm ki, bu münaqişədə biz istədiyimizə nail olacağıq, haqq-ədalət öz yerini tapacaq və Azərbaycan öz ərazi bütövlüyünü bərpa edəcək. Uzun illər ərzində məcburi köçkün kimi yaşayan soydaşlarımız da öz doğma dədə-baba torpaqlarına qayıdacaqlar".
"Mən erməni xalqına üz tutub demək istəyirəm ki,..."
Dövlət başçısı sonra da deyib: "Mən erməni xalqına üz tutub demək istəyirəm ki, onlar öz rəhbərliyinin çirkin əməllərinin girovuna çevrilməsinlər. Bu gün öz hökumətini məsuliyyətə cəlb etsinlər. Öz övladlarını Azərbaycan torpaqlarına göndərməsinlər. Nə işi var erməni əsgərinin Azərbaycan torpağında? Biz öz torpağımızda vuruşuruq. Bizim əsgər və zabitlərimiz öz torpağında həlak olur, öz torpağında yaralanır və biz öz torpaqlarımızı azad edirik".