Əli Əliyev nazirliyin bu qərarından məhkəməyə müraciət edəcəklərini deyir
Ədliyyə Nazirliyi Milli İstiqlal partiyası [AMİP] kimi rəsmi olaraq Etibar Məmmədovun başçılıq etdiyi partiyanı tanıyıb. Məlumatı nazirliyin mətbuat xidmətinin rəhbəri Aydın Ağazadə verib.
AMİP-in digər qanadına rəhbərlik edən Əli Əliyev isə nazirliyin bu qərarı ilə razı olmadığını deyir. O, "Azadlıq" radiosuna müsahibəsində bildirib ki, martın 30-da rəhbərlik etdiyi partiyanın toplantısı çağırılacaq və qərara siyasi qiymət veriləcək.
Əli Əliyev bildirib ki, böyük ehtimalla onlar Ədliyyə Nazirliyinin qərarından məhkəməyə müraciət edəcəklər: "Biz hökumətin bu qərarını özümüz üçün faciə hesab etmirik. Bununla belə, mübarizəmizi davam etdirəcəyik və hüququmuzu məhkəmə instansiyalarında tələb edəcəyik".
AMİP-in hər iki qanadı qeydiyyat üçün Ədliyyə Nazirliyinə bu ilin yanvarında müraciət etmişdilər.