«Sərhədsiz reportyorlar» beynəlxalq hüquq-müdafiə təşkilatı Naxçıvan Muxtar Respublikasının Sədərək qəsəbəsində jurnalistlərə təzyiq göstərilməsi faktını pisləyib.
Təşkilatın press-relizində deyilir ki, müxbirlər Məlahət Nəsibova, Həkimeldostu Mehdiyev, Mehman Mehdiyev və Elman Abbasov yanvarın 16-da yerli icra hakimiyyətinin nümayəndələri tərəfindən fiziki və mənəvi təzyiqə məruz qalıblar.
«Vəzifəsini yerinə yetirən jurnalistlərə qarşı belə münasibət yolverilməzdir. Azərbaycan hakimiyyətinin bu hərəkətləri ölkədə azad mətbuatın onsuz da pis olan vəziyyətini daha da pisləşdirir», - deyə press-relizdə qeyd edilib.
Hadisə jurnalistlərin bir neçə gün əvvəl itkin düşmüş Xanımzər Hüseynova və oğlu Elvi Hüseynovun taleyini araşdırmaq üçün Sədərəyə gəldikləri zaman baş verib.
/Turan/
