Elmar Məmmədyarov: «Əgər Ermənistan bütün detalları açmaq istəyirsə, onda belə çıxır ki, onda onlar amerikalı həmsədrinin dedikləriylə razılığa gəlmək istəmirlər»
Ermənistan Xarici İşlər Nazirliyinin iyunun 26-da yayılan bəyanatında deyilir ki, Ermənistan və Azərbaycan prezidentləri Qarabağın gələcək statusunun müəyyən edilməsi üçün referendum keçirilməsində məsələsində razılığa gəliblər. Onların razılaşmadığı məsələ hərbi münaqişənin nəticələrinin ləğvinin ardıcıllığı ilə bağlıdır. Bundan başqa, bəyanatda bildirilir ki, Azərbaycanın sülh razılaşmasının əsas elementlərinə dəyişkən münasibəti davam edərsə, Ermənistan Azərbaycanla Dağlıq Qarabağ arasında birbaşa danışıqlar aparılmasına təkid edəcək.
Birləşmiş Ştatların ATƏT-in Minsk Qrupunda yeni həmsədri Mətyu Brayza ötən həftə «Azadlıq» radiosuna müsahibəsində deyib ki, münaqişə tərəfləri «çərçivə razılaşması»nı müzakirə edirlər. Hansısa son mərhələdə Dağlıq Qarabağın gələcək statusu ilə bağlı səsvermə keçirilməsi nəzərdə tutulur. Ermənistan prezidentinin mətbuat katibi Viktor Soğomonyan iyunun 26-da Rusiyanın Reqnum agentliyinə bildirib ki, Brayza yalnız müzakirə olunan sənədin bəzi elementlərini açıqlayıb, bu da Qarabağa dair «çərçivə sazişi»nin tam məğzini açmır. Əgər gələcəkdə mediada belə açıqlamalar verilsə, Ermənistan son səkkiz ildə danışıqlarda, o cümlədən Ki Uest, Buxarestdə müzakirə olunmuş bütün sənədləri açıqlayacaq – deyə, Soğomonyan əlavə edib.
Azərbaycanın xarici işlər naziri Elmar Məmmədyarovsa bu bəyanatı Ermənistanın Mətyu Brayzanın açıqladığı prinsiplərlə razılaşmaq istəməməsi kimi qiymətləndirib. «Ki Uest artıq tarixdir, Buxarestdə nə müzakirə olunub məlumdur. Onda biz də gərək Lissabon samitindən danışaq ki, ATƏT-in bütün üzvləri Azərbaycanın ərazi bütövlüyünü tanıyır. Əgər Ermənistan bütün detalları açmaq istəyirsə, onda belə çıxır ki, onda onlar amerikalı həmsədrinin dedikləriylə razılığa gəlmək istəmirlər».
