Krıma zirehli texnika yığılır (3-4 mart xronikası)

-
Ukraynanın yeni hökuməti Sevastopolda qərargahını rus hərbçilərə təslim edən Dəniz Qüvvələri Komandanı Denis Berezovsky-yə cinayət işi açıb.

Denis Berezovsky Vətənə xəyanətdə ittihamı olunur.

Yeni hökumət Berezovsky-ni bu vəzifəyə ötən şənbə təyin etmişdi. Bazar günü isə o, televiziya vasitəsilə, Krım parlamentinin muxtar vilayətin yeni baş naziri seçilən rusiyapərəst siyasətçi Sergey Aksyonova sadiqliyini bəyan etmişdi. Bundan dərhal sonra rəsmi Kiyev Denis Berezovsky-ni vəzifədən azad edərək, ona qarşı cinayət işi açıb.

Kiyevin tanımadığı Aksyonov isə Ukraynanın yarımadadakı hərbi dəniz qüvvələrinə Kiyevdən hər hansı əmri yerinə yetirməməyi tapşırdığını bildirib.

Bu arada rus qoşunları yarımadada öz mövqelərini artıq möhkəmlədiblər. Onlar Krımdakı Ukrayna hərbçilərinin silahlarını təhvil vermələrini istəyirlər.

Nyu-Yorkda Rusiyaya qarşı etiraz aksiyası olub

Nyu-Yorkda yüzlərlə etirazçı Rusiyanın Ukraynaya müdaxiləsinə etiraz olaraq yürüş keçirib.

Əllərində Ukrayna bayraqları olan etirazçılar şəhərin mərkəzindəki meydanda Rusiyanın Ukraynaya müdaxiləsini pisləyib. Bundan sonra Rusiyanın baş konsulluğunun binası qarşısına yürüş ediblər.

Etirazçılar ABŞ-ı Ukraynanın müstəqilliyini və ərazi bütövlüyünü müdafiə etməyə, Rusiyaya qarşı sanksiyalar tətbiq etməyə çağırıblar.

-
Dünyanın 7 aparıcı dövlətini özündə birləşdirən Böyük Yeddilik - G-7
Rusiyanın Ukraynaya hərbi müdaxiləsini pisləyib.

ABŞ, Böyük Britaniya, Fransa, Almaniya, İtaliya, Yaponiya, Kanadanın, Avropa Birliyi Şurasının və Avropa Komissiyasının rəhbərlərinin imzaladığı bəyanatda deyilir ki, “Biz Ukraynanın suverenliyi və ərazi bütövlüyünü, BMT qarşısındakı öhdəliklərini və Ukrayna ilə 1997-ci ildə imzalanmış baza razılaşmasını pozmasını qınayırıq”.

Bəyanat müəllifləri bildirir ki, Rusiyanın Ukraynaya qarşı hərəkətləri G7 və G8-in əsaslandığı prinsip və dəyərlərin pozulması deməkdir. Rusiyanı Ukrayna ilə danışıqlara çağırıblar.

“Biz Ukraynanın ərazi bütövlüyünün, siyasi və iqtisadi inkişafının bərpası səylərini dəstəkləməyi öhdəmizə götürürük”.

John Kerry Kiyevə gedir

ABŞ Dövlət Katibi John Kerry martın 4-də Kiyevə səfər edəcək.

Dövlət Depaertamentindən yayılan rəsmi məlumata görə John Kerry Kiyevdə ölkənin yeni hökumətinin rəhbərləri, parlamentin liderləri, eləcə də vətəndaş cəmiyyəti fəalları ilə görüşəcək: “Dövlət Katibi Ukraynanın suverenliyinə, müstəqilliyinə, ərazi bütövlüyünə və Ukrayna xalqının kənar təxirlər və təxribatlar olmadan öz gələcəyini özünün müəyyən etməsinə ABŞ-ın güclü dəstəyini bird aha nümayiş etdirəcək” - deyə rəmi məlumatda bildirilir.

Praqada Ukraynaya dəstək aksiyası
Martın 2-də Çex Respublikasının paytaxtı Praqada Rusiya ordusunun əməliyyatları ilə üz-üzə qalan Ukraynaya dəstək aksiyası keçirilib. Mitinqə toplaşanlar Rusiya prezidenti Vladimir Putinin əleyhinə şüarlar səsləndiriblər. Aksiyadan fotolar.