Rus zabitlərini və kəşfiyyatda təqsirləndirilən digər şəxslərin həbsi nəinki Gürcüstanın siyasətində, həmçinin əhali arasında da gərginlik yaradıb. «Azadlıq» radiosunun Gürcüstandakı əməkdaşı xəbər verir ki, paytaxt Tbilisinin sakinləri həyat şəraitlərinin pisləşə biləcəyini güman edirlər.
İxtisasca geoloq olan, lakin hal-hazırda işləməyən Lela Mamaladze düşünür ki, Gürcüstan qaz və işığı Rusiyadan aldığı üçün münasibətlərin pisləşməsi ölkəni qazsız və işıqsız qoya bilər: «Məncə boş yerə bu zabitləri həbs etməyiblər. Əgər bunu ediblərsə, demək buna müəyyən səbəblər olub. Əlbəttə bu, yaxşı hal deyil. Bu bizim iqtisadiyyatımızda boşluq yarada bilər və bu, adi əhalinin güzəranına təsir edəcək».
Tbilisinin digər sakini Nino Patriaşvili isə deyir ki, məsələnin adi insanların həyatına necə təsir edəcəyinə qiymət vermək hələ tezdir:
Lakin, Gürcüstandakı siyasətçilər gərginliyin gec-tez aradan qalxacağına inanırlar. Beynəlxalq münasibətlər üzrə ekspert Georgi Xelaşvili deyir ki, Rusiya təkcə zabitlərin həbsinə görə deyil, həmçinin son zamanlar prezident Saakaşvilinin BMT-dəki çıxışı, Kodor dərəsində baş verənlər, NATO ilə aparılan danışıqlara görə Gürcüstandan qisas almaq qərarına gəlib: «Zabitlərin həbsi dövlətinin güc strukturları ilə fəxr edən Putinin nüfuzuna xələl gətirdi. Bu onun üçün xoş bir şey deyildi və bəlkə də o, bu məsələni şəxsi zərbə kimi qəbul edir».Politoloqun fikrincə, Şərqi və Mərkəzi Avropa və ya Baltikyanı ölkələrin NATO-ya üzvlüyü ərəfəsində də Rusiya oxşar təzyiqlərə əl atıb, amma, həmin ölkələrini NATO-ya üzvlük məsələsi həll ediləndən sonra münasibətlər normallaşıb. Cənab Xelaşvili güman edir ki, Gürcüstanın NATO-ya üzvlüyündən sonra Rusiya ilə münasibətlər düzələcək.
Siyasi məsələlər üzrə digər ekspert Ramaz Sakvarilidze də münasibətlərin yaxşılaşmasının nəinki arzuolunan, hətta real məsələ olduğunu düşünür: «ATƏT-in bu məsələyə qarışması göstərir ki, dünya ictimaiyyəti iki ölkə arasında münasibətləri yoluna qoymaq üçün çalışır».
