İlhamiyyə Rzayevanın vəkili polisə aparılıb
«Həmid onlarla ünvana yollananda məlum olub ki, yaşlı qadın əlil deyil, qutunun gətirilməsi ilə bağlı ərizə zad da yazmayıb». Ətraflı burada
Topa bülleten atarkən yaxalandı…
79 saylı İmişli seçki dairəsinin 14 saylı məntəqəsində müşahidəçilərdən biri YAP namizədi Əsabil Qasımovun lehinə işarələnmiş 24 bülleteni qutuya atarkən məntəqədə olan digər müşahidəçi tərəfindən yaxalanıb. Sonuncu həmin bülletenləri müsavatçı namizəd İltizam Əkbərliyə verib.
Bu barədə AzadlıqRadiosuna məlumat verən İ.Əkbərli bildirir ki, onlar bu barədə Mərkəzi Seçki Komissiyasına şikayət edəcəklər.
İcra nümayəndəsi 4 səs verib?
İmişli rayonunun Hacırüstəmli kəndində yerləşən 79 saylı İmişli seçki dairəsinin 39 saylı məntəqəsində kənd icra nümayəndəsi Yavər Şıxəliyev müşahidəçilərin gözü qarşısında qutuya nümayişkaranə surətdə 4 bülleten atıb.
Bu barədə AzadlıqRadiosuna məlumatı namizədliyi AMİP tərəfindən irəli sürülmüş Tapdıq Həsənov verib. Onun dediyinə görə, digər məntəqələrdə də qutulara topa bülleten atılması halları müşahidə edilir.
İmişli RİH başçısının Hacırüstəmli kənd inzibati ərazi dairəsi üzrə nümayəndəsi Yavər Şıxəliyev isə barəsində səslənən iddiaları təkzib edir: «Mən həqiqətən seçki məntəqəsində olmuşam. Amma digər seçicilər kimi cəmi 1 bülleten alıb, onu işarələyərək qutuya atmışam. Oradakı müşahidəçilər bükülmüş bülleteni açıb onlara göstərməyimi istəyirdilər. Bu, qanunsuz tələbdir, səsvermənin gizliliyi pozula bilərdi. Görünür, əlləri hər yerdən üzülüb, keçiblər böhtan atmağa, qarayaxmaya. Çox yaxşı seçki keçir, hər şey də öz qaydasındadır».
İlham Əliyev ATƏT-in seçki institutundan danışdı
Azərbaycan prezidenti İlham Əliyev ATƏT-in Demokratik Təsisatlar və İnsan Hüquqları Bürosunun Azərbaycanda keçirilən parlament seçkilərini izləməməsindən danışıb. APA-nın məlumatına görə, O, bu barədə fikrini Malta parlamentinin spikeri Angelo Farrugia-nın başçılıq etdiyi nümayəndə heyətini qəbul edərkən bildirib.
İlham Əliyev deyib ki, Azərbaycanda parlament seçkilərini müşahidə etmək üçün həmin quruma dəvət göndərilib. Lakin həmin qurum bu qərarı ATƏT Parlament Assambleyasının daimi komitəsində müzakirəyə çıxarmadan və ATƏT-in baş katibini məlumatlandırmadan verib. Bu zaman isə öz mandatını kobud şəkildə pozub.