Ermənistanda dövlət ittihamçısı silahlı qruplaşma üzvlərinə uzunmüddətli həbs cəzaları tələb edib. Sasna Tsrer qrupunun üzvləri 2016-cı ildə paytaxt Yerevanda polis şöbəsini tutaraq siyasi tələblər irəli sürmüşdülər.
Qruplaşmaya bir sıra tanınmış Qarabağ (Azərbaycanın Qarabağ vilayəti və ətraf rayonlar Ermənistanın işğalı altındadır – red.) müharibəsi veteranları daxildir. 20-dən çox üzv saxlansa da, onların çoxu 2018-ci ildə Ermənistanda hakimiyyət dəyişəndə azad olundu. Bir çoxu parlament üzvlərinin zəmanətilə buraxıldı.
2016-cı ilin iyulunda Yerevanın Erebuni rayonunda polis şöbəsini tutmuş silahlılara istefada olan polkovnik Varuzhan Avetisian başçılıq edirdi. Onlar ovaxtkı prezident Serzh Sarkisian-dan həbsdə olan millətçi siyasətçi Zhirayr Sefilian-ı buraxmağı və istefa verməyi tələb edirdilər.
Qruplaşma üzvləri proses zamanı özlərini müdafiə ediblər
İki həftə çəkən qarşıdurmada 3 polis əməkdaşı həlak oldu, girovlar götürülmüşdü, sonucda silahı yerə qoydular.
Avqustun 12-də prokuror Artur Chakhoian Avetisian və qrupun başqa bir lideri Pavel Manukian-ın uyğun olaraq 8 il 9 ay və 9 il həbsə məhkum edilməsini istəyib.
Sasna Tsrer üzvləri Smbat Barseghian və Armen Bilian-a isə uyğun olaraq ömürlük və 21 il həbs tələb olunub.
Prokuror mühakimə olunan digər üzvlərə 8-9 il həbs cəzası tələb edib.
Proses zamanı Sasna Tsrer üzvləri, özlərinin dediyi kimi, opressiv rejimə qarşı üsyan hüquqlarından istifadə etdiklərini deyiblər.
Sasna Tsrer hərəkatı əsasında formalaşdırılmış, Avetisian-ın rəhbərlik etdiyi siyasi partiya 2018-ci ilin dekabrında erkən parlament seçkisinə qatıldı. Ancaq partiya parlamentə düşmək üçün gərəkən 5 faizlik baryeri aşa bilmədi, 2 faizdən də az səs yığdı.
Serzh Sarkisian 2018-ci ilin aprelində kütləvi küçə etirazları nəticəsində baş nazir postundan getməli oldu, etirazların lideri Nikol Pashinian hakimiyyətə gəldi.
