Rusiyada Gamaleya adına epidemiologiya və mikrobiologiya elmi mərkəzinin hazırladığı texnologiya COVID-19 vaksinini iki gün ərzində virusun mutasiyasına qarşı yeniləmək imkanı verir. Bu haqda mərkəzin direktoru Aleksandr Ginzburq danışıb.
RİA Novosti-yə müsahibəsində o, həmin texnologiyanın adenovirus vektorlarına əsaslandığını deyib. Ginzburqun sözlərinə görə, hazırda yeni vaksini bütün fazalarda sınaqdan keçirib-keçirməmək müzakirə olunur. Dünyada bir preparatın 100 nəfər üzərində yoxlanmasına icazə verilən hallar olub. Yeni vaksin əvvəlki kimi qoruma təmin etsə, onun kütləvi istehsalına dərhal başlamaq olar.
Rusiyada da mutasiyalar aşkarlanıb
Ötən ilin payızında koronavirusun mutasiyaları ciddi problem yaratmağa başlayıb. Alimlər onda SARS-CoV-2-nin daha yoluxucu Britaniya variantının aşkarlandığını bildiriblər. Onlarla ölkə Britaniya ilə hava əlaqəsini dayandırıb.
Yanvarda “Rospotrebnadzor” rəhbəri Anna Popova Britaniyadan qayıtmış rusiyalıda həmin ştammın aşkarlandığını deyib. Martda isə Rusiyada COVID-19-un Cənubi Afrika variantının tapıldığı açıqlanıb. Bu ştammın daha yoluxucu olduğu bildirilir.
“Rospotrebnadzor” fevralın ortasında koronavirusun mutasiyasını üzə çıxaran ilk test sisteminin qeydə alındığını bəyan edib.
Hazırda Rusiyada COVID-19-a qarşı üç vaksin qeydiyyata alınıb: Gamaleya Mərkəzinin hazırladığı Sputnik V, Vektor Novosibirsk Mərkəzinin EpiVakKorona və Çumakov institutunun KoviVak vaksini. Rusiyada kütləvi vaksinasiya yanvarda başlanıb, amma əhalinin beş faizindən də azına vaksin vurulduğu deyilir.
