Qazaxıstan polisi Çinlə həmsərhəd və etnik baxımdan qarışıq kəndin məktəb həyətində baş vermiş toqquşma ilə bağlı iki cinayət işi açıb.
Məktəblilər arasında başlamış dava-dalaş böyüyərək millətlərarası iğtişaşa çevrilib.
Polis bildirir ki, dava oktyabrın 27-də Çinlə sərhədin 25 kilometrliyindəki Penjim orta məktəbinin şagirdləri arasında düşüb.
16 yaşlı məktəblinin xəstəxanaya aparıldığı xəbər verilir.
Penjim kəndinin yerləşdiyi Panfilov rayonunun 130 minlik əhalisinin əksəriyyətini etnik qazaxlar, 30 faizini isə uyğurlar təşkil edir.
Penjimdə baş vermiş dava-dalaşa aid olduğu iddia edilən və WhatsApp-da yayılmış videoda uşaqlardan birinin yerə yııxıldığı və daha qalxmadığı görünür.
Həkimlər və rəsmilər yeniyetmənin sağlıq durumu haqqında ziddiyyətli məlumatlar verirlər.
Həkimlər qazax millətindən olan yeniyetmənin kəllə zədəsi aldığını və ağır vəziyyyətdə olduğunu deyirlər.
Lakin Panfilov rayonunun icra başçısı Talqat Umiraliyev AzadlıqRadiosuna deyib ki, uşağın vəziyyəti sabitdir:
"Mən ona bugün baş çəkmmişəm. Biz baş həkimlə görüşmüşük. Uşağın əl-ayağı salamatdır, nitqi səlisdir, gecə əməliyyat ediblər. Başından zədə alıb. Əməliyyat edib hematomanı çıxarıblar. Uşağın özü ilə danışanda dedi ki, yaxşıdır”.
Polis nə deyir?
Rəsmilər kənddə vəziyyətin nəzarət altında olduğunu, məktəb həyətində baş vermiş dava və kənddəki sonrakı iğtişaş barəsində iki cinayət işinin açıldığını bildiriblər.
Məktəb həyətində başlanmış davanın səbəbi bilinmir. Lakin polis bildirir ki, sonradan yetkin yaşlı 30-a yaxın şəxs dava edən uşaqlardan birinin evinin yaxınlığında toplaşıb.
Polis böyüklər də daxil, hadisədə iştirakda şübhəli bilinənlərin dindirilməsi ilə məşğuldur.
Polis bunu da bildirib ki, bir neçə evlərin və avtomobillərin pəncərələri sındırılıb.
Hakimiyyət orqanları iğtişaş zamanı evlərə od vurulmasına dair sosial mediada yayılmış xəbərləri təkzib edib.
Regional polisin bu barədə yaydığı məlumatda deyilir ki, bir evdə yanğın sobanın nasazlığına görə baş verib.
Polis yalan məlumat yayanların məsuliyyətə cəlb olunacağı barədə xəbərdarlıq edib.
Hadisənin ardınca, oktyabrın 28-də hakimiyyət orqanları sakinləri yerli Mədəniyyət Evinə toplayaraq izahat işi aparıb.
AzadlıqRadiosunun canlı yayım apardığı həmin görüşdə bəziləri Penjimdə bu kimi hadisənin ilk dəfə deyil baş verdiyini bildiriblər.
