Almaniya aprelin 17-də bildirib ki, ölkədə bir aydır davam edən karantin koronavirus pandemiyasını nəzarət altına gətirib.
Berlin bildirir ki, bazar ertəsi, yəni aprelin 20-dən kiçik mağazaların açılmasına icazə verilir və uşaqlar tezliklə məktəbə gedə biləcəklər.
AFP agentliyi yazır ki, bu, Avropada Fransa və Britaniyanın karantini uzatdıqları bir vaxtda virusla mübarizədə ciddi uğur hesab edilə bilər.
Dünya Səhiyyə Təşkilatı aprelin 16-da Avropanı “qasırğanın gözü” adlandırmışdı.
Dünya miqyasında 140 mindən çox ölümün 90 mini Avropada qeydə alınıb.
Bununla yanaşı Almaniyada infeksiya ilə bağlı göstəricilər əhəmiyyətli şəkildə azalıb.
Yoluxma əmsalı 0.7-yə enib
Səhiyyə naziri Jens Spahn aprelin 17-də deyib ki, epidemiya indi nəzarət altındadır.
Statistikaya görə hazırda Almaniyada bir adam orta hesabla “1 nəfərdən az adamı” koronavirusa yoluxdurur.
Robert Koch İnstitutunun verdiyi məlumata görə hazırda Almaniyada bir nəfərin yoluxuculuğu 0.7-yə düşüb.
Koronavirus epidemiyanın güclü olduğu yerlərdə bir nəfərdən orta hesabla üç nəfərə yoluxur.
Almaniyada indiyədək 134 min yoluxma, 3868 ölüm qeydə alınıb.
“Səhv etmək riski böyükdür”
Kansler Angela Merkel bildirib ki, indi hər iki və ya üç həftədən bir vəziyyəti təhlil etməklə məhdudiyyətlərin qaldırılması prosesinə başlana bilər.
Lakin təcrübəli siyasətçi əlavə edib ki, bu məsələdə “səhv etmək riski çox böyükdür”.
Bu da xəbər verilir ki, Berlin iki nəfərdən artıq insanın bir araya gəlməsini qadağan edən qayda da daxil, qalan məhdudiyyətləri qüvvədə saxlayır.
Almaniyada keçirilmiş rəy sorğuları ictimaiyyətin sərt məhdudiyyət qaydalarını dəstəklədiyini göstərib.
Volkswagen kimi bir sıra iri şirkətlər tədricən açılış üçün öz mərhələli proqramlarını hazırlayıb.
Məsuliyyətli könüllülük
Almaniyanın səhiyyə naziri Spahn deyib ki, ölkədə avqust ayından başlayaraq hər həftə 50 milyon maska hazırlanacaq.
Bunlardan 40 milyonunun sadə, 10 milyonunun isə FFP2 tipli xüsusilə etibarlı maska olacağı planlaşdırılıb.
Buna baxmayaraq Almaniya qonşu Avstriyadan fərqli olaraq ölkə boyunca maskadan istifadəni məcburi etməyib.
Spahn bildirib ki, adamlar maskadan könüllü şəkildə istifadə edəcək qədər məsuliyyətlidirlər.
