Avropa Şurası Azərbaycandan izahat istəyəcək
“Azadlıq Radiosunun Bakı bürosunun bağlanması yenidən Azərbaycanda ifadə azadlığı barədə narahatlıq yaradır.
Avropa Şurası bu hərəkətin səbəbi və hüquqi əsasları barədə Azərbaycan hakimiyyətinə müraciət edəcək”.
Bu bəyanatı dekabrın 28-də Avropa Şurasının baş katibinin sözçüsü Daniel Holtgen verib.
Dekabrın 26-da polis Azadlıq Radiosunun Bakı bürosunu möhürləyib, bağlayıb. Bakı bürosunda işləyən 10 əməkdaş prokurorluğa ifadə verməyə parılıb və ya çağırılıb.
Jurnalistlər hələ içəridədir
Səhər tezdən yerli polis idarələri, sonra da prokurorluğa gətirilən AzadlıqRadiosunun əməkdaşlarının dindirilməsi davam edir.
Səhər zorakılıq tətbiq edilərək mənzilindən ayaqyalın və üst geyimi olmadan çıxarılan aparıcı Kamran Mahmudov Yasamal prokurorluğunda ifadə verib, çıxıb.
AzadlıqRadiosunun vəkili Yalçın İmanovu polis şahidkimi prosesdən uzaqlaşdırıb.
AzadlıqRadiosunun əməkdaşları vəkillə birgə Bazar ertəsi səhər prokurorluqda ifadə verməklə bağlı razılıq əldə edilsə də, polis şənbə günündən etibarən jurnalistlərin Bakıda və bölgələrdəki evlərinə gəlməyə başlayıb.
AzadlıqRadiosu vəkilinin prosesdən uzaqlaşdırlma səbəbi
Baş Prokurorun 1-ci müavini Rüstəm Usubov AzadlıqRadiosunun vəkili Yalçın İmanovun 2011-ci ildə AzadlıqRadiosundan ödəniş olunması əsas gətirilərək onun müdafiəçi olaraq vəkil kimi işdən uzaqlaşdırılması və şahid kimi işə cəlb olunması ilə bağlı qərar verilib.
Yalçın İmanov qərara əsasən bu gün prokurorluqda dindirilib. Vəkil həm işdən uzaqlaşdırılması, eləcə də son iki gündə AzadlıqRadiosunun ofisində axtarış aparılması və ofisin möhürlənməsi, radionun əməkdaşlarına qarşı təzyiqlər, hədə-qorxu və xof yaradılması kimi əməllərin qanunsuz olduğunu, və QHT-lər adı altında aparılan istintaqla bağlılığı olmadığı üçün əsassızlığını hüquq-mühafizə orqanlarının da diqqətinə çatdırılıb.
İstintaq sirri olduğu üçün AzadlıqRadiosu əməkdaşlarının hansı suallarla bağlı dindirilməsini və ifadələrinin özəlliklərini paylaşmasa da, ümumən sualların jurnalist fəaliyyətləri ilə bağlı olması da Yalçın İmanovun fikrincə, onlara qarşı istintaq tədbirlərinin əsassız olduğunu göstərir.