Rusiyanın əhalisi dalbadal iki ildir ki, azalır və miqrant axını bu azalmanın qarşısını ala bilmir.
AzadlıqRadiosunun Rus xidməti Rusiya Statistika İdarəsinə istinadən yazır ki, əhali azalması 2026-cı ilədək artan xətlə davam edəcək.
Rosstatın məlumatında deyilir ki, 2020-ci il, yanvarın 1-ə olan məlumata görə Rusiyanın əhalisi 146 milyon 745 min nəfərdir.
2018-ci ilin əvvəli ilə müqayisədə əhali 35 min 622 nəfər azalıb.
Gələn il azalmanın artacağı gözlənilir.
2009-cu ildən 2017-ci ilədək Rusiya əhalisi artmaqda idi. Lakin 2018-ci ildə son on ildə ilk dəfə olaraq əhali 99 min nəfər azalıb.
2016-cı ildən sürətlənmiş əhali azalmasının əsas səbəbi olaraq təbii artımın azalması göstərilir.
Rusiyanın 85 regionunun 80-də doğuşların azalması müşahidə edilir.
Bu da qeyd olunur ki, hökumətin əhali artımını stimullaşdırmaq cəhdləri fayda vermir, çünki reproduktiv yaşda olan qadınların sayı da azalır.
2019-cu ilin əvvəllərində belə qadınların sayı 35 milyondan çox deyildi.
Rusiya hökuməti 2019-cu ilin aprelində bildirmişdi ki, 2018-ci ilin nəticələrinə görə Rusiyanın hər üç regionundan birində ölümlərin sayı artıb.
2015-ci ilin mayından hökumət Rusiya əhalisinin sayına ilhaq edilmiş Krımın 2 milyonluq əhalisini də qatıb.
Amma yarımada 2014-cü ildə ilhaq ediləndən bəri Krımın əhalisi də 50 min nəfər azalıb.
